Промени во пласманот: Иџе го освои второто место на Имола

Игор Стефановски Иџе напредуваше за уште една позиција по последните одлуки на стјуардите, кои очигледно решија да казнат еден од двајцата возачи кои имаа подобар пласман од Македонецот на Имола.

Иџе беше единствен странски натпреварувач на двете трки викендов во италијанскиот ТЦР шампионат, а првично, според провизорниот редослед го освои третото место, па дури го зазема тоа место и на победничкиот пиедестал.

Стефановски гордо го развиори македонското знаме од најниската позиција на пиедесталот, но неколку часа подоцнаа, од тимот на нашиот автомобилист стигна информацијата дека Иџе оди позиција понапред, односно на второто место.

Ова се вредни први бодови за Иџе во првенството, со оглед дека ги пропушти првите два викенда поради неможноста да добие дозвола за влез во Италија.

На првата трка возена вчера, нашиот претставник беше конкурентен и на добра позиција, но излета од патеката поради проблеми со сопирачките.