Гатузо за пристигнувањето во Хајдук: Само лудак како мене може да прифати такво нешто

Џенаро Гатузо сезонава се надева дека ќе му ја обезбеди толку посакуваната титула на Хајдук, а и самиот признава дека ја прифатил понудата на хрватскиот клуб и покрај тоа што знаел дека го очекуваат лоши услови и голем притисок во Сплит.

Во последното интервју објавено во хрватските медиуми, Гатузо зборувал за начинот на кој ја прифатил понудата на тогашниот спортски директор, Никола Калиниќ.

– Кога Калиниќ дојде во Марбелја за да ме убеди да ја прифатам понудата, знаев каде доаѓам, сите потешкотии и фактот дека цел Сплит живее за Хајдук.

– Им реков на моите соработници од стручниот штаб дека за нас ова е Реал Мадрид. Нема да размислуваме за тоа дека клубот нема помошни терени и дека условите не се идеални, туку само за тоа да работиме напорно, нешто што е императив за да стигнеме каде што сме.

– Само лудак како мене може да прифати ваква понуда, а горд сум поради тоа бидејќи чувствувам дека цел град ме поддржува. На почетокот не беше така, постоеше студен однос, но тоа е нормално, мораа да ме запознаат и сега чувствувам дека сите се со мене и во добро и во зло, – открил Гатузо.