Гасперини по контроверзниот пенал за Бриж: Фудбалот станува непрепознатлив спорт

Аталанта загуби на гостувањето кај Клуб Бриж во плејофот во Лигата на шампионите, но ќе има можност да го неутрализира негативниот резултат на домашен терен.

Сепак, гостите од Италија ја напуштаат Белгија бесни поради одлуката на турскиот судија Мелер, која директно влијаеше на резултатот и тоа во самиот финиш на средбата.

Домашниот состав доби пенал, кој во 94. минута го претвори во гол за победа од 2:1, а фудбалерите на Аталанта притоа заработија и неколку жолти картони поради протестите кај судијата.

На крајот бесен беше и тренерот Џан Пјеро Гасперини, а во првата изјава истакнал дека не може да поверува дека вакви контакти се судат како пенали.

– Фудбалот е контаминиран, сите имаме различна претстава што е прекршок, а фудбалерите се обидуваат постојано да изнудат нешто на сметка на противникот.

– Фудбалот оди во насока која нема никаква врска со нашиот спорт, мора да ја прифатиме одлуката, но јас дефинитивно веќе не ги знам правилата на играта.

– Треба да скокаме и трчаме како пингвини, со рацете до телото, правилата се менуваат во погрешна насока и фудбалот станува непрепознатлив спорт, – истакнал Гасперини.