Дисциплинската комисија изрече казни за Тиквеш, Башкими и Вардар Неготино

Дисциплинската комисија на Фудбалската федерација на Македонија денеска ги одреди казните за последните посериозни инциденти во првата и втората македонска лига.

Прволигашот Тиквеш чиј терен беше суспендиран поради инцидентот на дуелот со Вардар, доби забрана да ги игра следните два натпревара на свој терен и истите како домаќин ќе треба да ги организира на најмалку 100 километри оддалеченост од Кавадарци.

Идентична казна заработија и второлигашите Башкими и Вардар Неготино, на чии терени исто така се случија инциденти на последните натпревари.

Во Кавадарци, удрен со тврд предмет беше еден од асистентите на главниот судија Александар Ставрев, по што овој го прекина дуелот меѓу Тиквеш и Вардар.

Башкими е казнет за инцидентот при соочувањето со Беласица, додека Вардар Неготино за случувањата на дуелот со Охрид.