Чупиќ: Трофеи, живот и ракометна енергија – Вардар и Скопје ми овозможија уникатни моменти во кариерата

Иван Чупиќ ја заврши ракометната кариера со многу трофеи, вклучувајќи ги и најпрестижните клупски, освоени во дресот на Вардар, а во меѓувреме почна нова ракометна етапа во својот матичен клуб Метковиќ.

Колегата Тони Митев од Спортското радио 90,3 фм, реализираше ексклузивно интервју со поранешното хрватско крило во неговиот роден град, а Чупиќ се наврати на периодот кога беше дел од Вардар и живееше во Македонија, истовремено запознавајќи ги ракометните фанови и со неговата актуелна преокупација.

– Откако ја завршив играчката кариера, се вратив на почеток, односно во мојот град и матичен клуб Метковиќ. Работам како тренер и координатор на младинскиот погон, почнав нова етапа во кариерата, напорно работам и се развивам во таа насока и засега сум задоволен, – вели Чупиќ.

Поранешниот член на Вардар се наврати и на периодот додека настапуваше за Вардар и спомените кои ги носи од тој период.

– Јас и целото мое семејство поминавме пет убави години во Скопје, веројатно и најубавите спортски и играчки денови ги поминав токму таму. Сите мои соиграчи од тоа време, а сега пријатели, знаат дека сакав да ја завршам играчката кариера во Вардар, но животот на спортистите е таков, непредвидлив, а тоа ми се случи и мене.

– Сите знаат колку Вардар ми е во срце, тоа е мој втор дом, сите во семејството имаме само најубави спомени. Не се работи само за трофеите, туку цела таа ракометна енергија во Скопје, горд сум и среќен што добив можност да настапувам за скопскиот тим, – вели Чупиќ.

Целото интервју на Чупиќ за Спортското радио 90,3 фм може да го слушнете ТУКА