АЕК со соопштение се обиде да го оправда предизвиканиот скандал во Скопје

Европската ракометна сцена остана без најавеното финале во Европскиот куп меѓу Алкалоид и АЕК, а гостинската екипа која одби да го одигра натпреварот во Скопје сега ја префрла одговорноста на македонскиот претставник.

Неколку часа по потврдата дека натпреварот нема да се одигра, АЕК објави официјално соопштение, со кое се обиде да го оправда својот потег на реваншот од финалниот двомеч.

– АЕК значи чест, гордост, почит, морални вредности. АЕК значи семејство, значи обединување. Најголемата поддршка ја добиваме од нашите верни навивачи, а нивно непочитување значи и непочитување на АЕК. Затоа, нашата управа денеска едногласно донесе тешка, но неопходна одлука.

– Нема сила што може да нанесе неправда, како што локалните власти во Скопје се обидоа, кулминирајќи со недозволувањето на дел од нашите навивачи да ја минат границата и да влезат во земјата, како што беше договорено на утринскиот безбедносен состанок. Сите сме тука и продолжуваме обединето, не преговараме за гордоста на АЕК, – вели грчкиот тим објаснувајќи го својот став.

Епилогот од денешниот скандал предизвикан од АЕК е во рацете на ЕХФ и нејзините комисии.