Звезда испушти „плус 14“ против европскиот шампион, па на крајот претрпе болен пораз

По трите стартни победи, Црвена Звезда влезе во негативна серија во Евролигата, па така вечерва го претрпе и четвртиот пораз во низа во натпревар кој беше навистина интересен за неутралните фанови.

Европскиот шампион Панатинаикос допатува во Белград со мисија да оствари победа, а иако во една фаза од мечот изгледаше дека нема шанси за такво нешто, на крајот Грците се изборија за тесна и важна победа.

Звезда испушти плус 14 во третиот период и му дозволи на фаворитот да се врати во игра, но се чини дека клучна беше серијата од 13:2 која ја направи тимот од Атина.

Панатинаикос се доближи на само минус еден (56:55) и стана јасно дека ќе гледаме супер завршницата на оваа дерби пресметка, во која се играше кош за кош до последните 30 секунди.

При резултат 77:77, Панатинаикос зададе удар и потоа следеше промашување на Теодосиќ, па така на крајот Грците си заминаа од српската престолнина со победа од 77:81.