Жорди Кројф за модернизацијата на фудбалот: Гвардиола секогаш го споменува мојот татко, но…..

Пеп Гвардиола цел успех кој го оствари во својата играчка кариера во најголем дел му го препишува на својот ментор Јохан Кројф, па затоа во безброј наврати има посочено дека Холанѓанецот е тој кој го модернизирал фудбалот две децении порано пред тој да се појави на сцената.

Шпанскиот стручњак испиша историја како тренер на Барселона и потсети на „дрим-тимот“ кој го имаше Кројф во 90-тите години на минатиот век, а како човек кој вечно ќе му биде благодарен на својот учител, Гвардиола има посебно значење и во семејството на неповторливиот Јохан.

Жорди Кројф како син на Јохан сега си даде за право посебно да го апострофира значењето кое го има Пеп за модерниот фудбал, посочувајќи дека и покрај зборовите на Шпанецот, сите во неговото семејство сметаат дека тој само ја усовршил напаѓачката ориентација на неговиот татко.

– Фановите сакаат да гледаат забавен и напаѓачки фудбал, сакаат да гледаат пожртвуваност и посветеност на теренот. Фановите сакаат да бидат горди на својот тим, тоа беше како религија за мојот татко.

– Гвардиола секогаш го споменува мојот татко и ние како семејство сме му секогаш благодарни, но сите ние сметаме дека тој е човекот кој го модернизираше фудбалот и сите заслуги треба да му се препишат нему. Стилот на Холанѓаните е да се притиска високо и да се игра на победа, да се игра на гол повеќе. Тоа сега се рашири на сите страни во Европа, не се размислува така само во Холандија. Мојот татко повеќе сакаше да победи 5:4, отколку да победи 1:0. Истото важи и за Пеп, иако Гвардиола најмногу сака да победува 5:0, – вели Жорди Кројф.