Жиру на промоцијата во МЛС: Златан беше на погрешната страна на градот, но ми даде важен совет

Оливие Жиру бил официјално промовиран како засилување на американскиот клуб Лос Анџелес, а на првата прес-конференција зборувал за своите мотиви да ја напушти Европа и да настапува во МЛС во залезот на кариерата.

Францускиот напаѓач дојде во Калифорнија од редовите на Милан, каде имаше повеќе од успешен престој, а соработуваше и со Златан Ибрахимовиќ. Ибра своевремено беше член на градскиот ривал Л.А Галакси, а Жиру открил дека добил важен совет од него кога размислувал дали да ја прифати понудата.

– Зборував со Златан, кој покрај другото играл во погрешен дел од градот, ми порача дека ќе уживам бидејќи ова е перфектна лига за напаѓачите.

– Неговиот впечаток е дека овде тимовите не играат за да се бранат, туку за да постигнат што повеќе голови и да ги забавуваат страстните фанови, – рекол Жиру.

Интересно е што и самиот Французин пред четири години имал понуда од Галакси, но тогаш решил дека е рано да ја напушти Европа. Сега ќе настапува за најголемиот ривал, каде почнува со тренинзи и ќе се подготвува за својот деби настап, а ќе му биде соиграч на сонародникот Иго Лорис.