Жезус постигна два гола после точно шест месеци, Арсенал со идентични 4:1 му одговори на Сити (Видео)

Габриел Жезус последниот гол во Арсенал го постигна на 1-ви октомври во дербито со Тотенхем, а точно шест месеци подоцна, Бразилецот стави крај на лошиот период кој го остава зад себе.

Напаѓачот кој одлично отвори во новата средина заработи тешка повреда на Светското првенство, по што мораше да направи долга пауза и да се фокусира на рехабилитацијата на коленото.

Арсенал успеа да ја одржи предноста на табелата и без него, а денеска како стартер, Жезус погоди после шест месеци и ја најави убедливата победа на „топчиите“ против Лидс.

Најпрво сам се избори за пенал и ја презема одговорноста за водство на фаворитот, но потоа погоди и во вториот дел по едно одлично проигрување од Тросар.

Пред вториот гол на Жезус, Вајт веќе стрелаше за 2:0, а предноста од три гола разлика во 55-та минута јасно стави до знаење дека бодовите остануваат во Лондон.

Лидс успеа да постигне почесен гол преку Кристенсен, но Гранит Џака постигна четврти гол во мрежата на гостите и одговори на Сити со иста мера, односно со истиот резултат како што тие славеа денеска против Ливерпул.