Ждрепка за ЛШ: Двајца македонски репрезентативци стојат на патот на Шкупи!

Како нов првак на Македонија, Шкупи се најде во ждрепката за квалификациите во Лигата на шампионите, случување кое се одржа ова попладне во седиштетот на УЕФА.

Тимот од Чаир доби поволна ждрепка за првото коло и ќе се сретне со Линколн од Гибралтар, но ако ја оправда фаворитската улога, тогаш го чека пеколна задача.

Во второто коло ги чека актуелниот хрватски шампион и најдобар фудбалски колектив од Балканот со години наназад, големиот Динамо Загреб предводен од Гоце Седлоски.

Фудбалскиот стручњак е добро познато име во Динамо и сигурно би влегол во двете пресметки со посебни емоции, но истите ќе бидат интересни и поради македонските репрезентативци.

Аријан Адеми и Стефан Ристовски се едни од носителите во Динамо, но за да дојде до тој дуел, Шкупи прво ќе мора да ја заврши работата со Линколн, двомеч кој е закажан за 5-6 јули и 12-13 јули.