Згасна и последната надеж: Македонија не доби вајлд-карта за СП

Светската ракометна централа денеска ги објави имињата на селекциите кои добиваат вајлд-карта за настап на Светското првенство, а меѓу нив не е репрезентацијата на Македонија.

ИХФ донесе конечна одлука и реши двете места да им припаднат на Австрија и Исланд, со што пропадна и последната надеж дека нашите девојки ќе имаат можност да играат на уште едно големо натпреварување.

Македонија лани како коорганизатор беше дел од Европското првенство и стекна искуство кое нема да го заборави, но сепак лошите резултати и поразот во баражот не влијаеја позитивно врз одлуката на ИХФ.

Инаку, по поразот во баражот настана и голема промена во женскиот македонски ракомет, бидејќи селекторот и координатор на сите селекции си поднесе оставка (Љубомир Савевски).

Светското првенство ќе се игра во Данска, Норвешка и Шведска, а ждрепката е закажана за 6-ти јули.