Заврши годината за Нојер: Првиот црвен картон во кариерата го плати со скршено ребро

Венсан Компани изминатиов викенд соопшти дека Мануел Нојер не играше против Хајденхајм како последица на дуелот кој го имаше со Фримпонг во Куп пресметката со Баер Леверкузен, но денеска тренерот на Баерн Минхен беше поопширен и откри дека капитенот нема да игра до крајот на годината.

Нојер имаше невнимателен излет од голот на Куп натпреварот кој се одигра минатата недела и го заработи првиот црвен картон во кариерата, но истиот сега го плати со скршено ребро.

Мануел задоцни во обидот да стигне до топката и директно се заби во играчот на Леверкузен, а неколку дена подоцна стана јасно дека го извлекол и подебелиот крај.

Искусниот голман скршил ребро и ќе мора да паузира неколку седмици, па Компани го очекува назад во тимот на почетокот на 2025-та година.

– Мануел Нојер е повреден, прегледите покажаа дека има скршено ребро. Најверојатно нема да игра до крајот на годината, го очекуваме назад на почетокот на месец јануари, – изјави Компани.