Занети: Интер не може да избере меѓу Серија А и ЛШ

Екипата на Интер денеска го дозна ривалот во осминафиналето на Лигата на шампионите, а тоа е Феенорд, холандскиот тим кој во плејоф рундата го елиминираше Милан.

Потпретседателот на „нероаѕурите“, Хавиер Занети беше присутен во Нион на ждрепката и е задоволен што калчолигашот ќе се соочи со составот од Ротердам.

-Да речеме дека нашето патување досега беше одлично, сега започнува нокаут натпреварувањето. Феенорд заслужува почит за тоа што успеа да го постигне. Ќе се подготвиме максимално за натпреварите и ги имаме сите услови да веруваме дека можеме да се пласираме понатаму. Тоа во голема мера зависи од нас. Ние секогаш имаме значајни одговорности, ние сме Интер, важен тим и ова натпреварување е многу престижно. Ќе се обидеме да го носиме италијанското знаме што повисоко, -истакна Занети кој порача дека Интер ќе игра за титулите во Серија А и ЛШ.

-Ние го немаме луксузот да избираме. Мора да се стремиме да одиме до крај во двете [натпреварувања]. Сите сакаат да ја освојат лигата и знаеме што значи да ја освоиш. Но, тука е Лигата на шампионите, ние сме последниот италијански тим што ја освоил и секогаш ќе се трудиме да ја испочитуваме и да стигнеме до финалето, исто како пред две години. Да се ​​натпреваруваме и во двете е тешко, но нашиот начин на размислување е да одиме до крај. Не можеме да избереме, -истакна Аргентинецот.