Заминувањето на Гундоган не е доволно за Барселона да го регистрира Олмо

Специфичната финансиска ситуација во Барселона го става клубот во позиција да го планира секое регистрирање на фудбалерите во пресрет на веќе започнатата сезона, а барем засега на списокот регистрирани го нема Дани Олмо.

Големото засилување од РБ Лајпциг го пропушти првото коло во Ла Лига, а се очекуваше дека заминувањето на Илкај Гундоган ќе биде доволно за комплетирање на процесот и добивање право на настап за шпанскиот репрезентативец.

Со разделбата со Германецот, Барса ќе заштеди сума меѓу 15 и 20 милиони евра, што се сметаше дека е доволно за регистрација на Олмо, но очигледно ќе мора да се обезбеди уште некоја продажба за завршување на овој дел од активностите на раководството.

„Кадена Копе“ тврди дека и покрај ваквото сценарио со Гундоган, Барса се уште нема можност да го регистрира Олмо и за такво нешто ќе мора да реализира дополнителен трансфер.

Во игра за заминување се Витор Роке, Клеман Ленгле и Микајил Фаје, но нејасно е дали некој трансфер/заем ќе биде реализиран навреме, за Олмо да може да биде во составот против Атлетик Билбао.