Захариевски си пронајде нова работа во ПМФЛ (Фото)

Фудбалскиот клуб Пелистер на крајот од годината сосема неочекувано се раздели со шефот на стручниот штаб, Влатко Костов, а по четири дена во новата 2025-та, битолчани информираа за ангажман на нов тренер.

Битолската гордост го назначи Срѓан Захариевски за нов предводник на првиот тим, што всушност претставува кам-бек на Срле во клубот во кој веќе работеше како тренер во 2017-та година.

Захариевски забележа позначителни резултати како тренер на Струга и Воска Спорт во последно време, а оваа сезона кратко го водеше и тимот на Вардар.

– Новата година е време за нов почеток за нашиот клуб. Ни претставува особено задоволство да ви го претставиме нашиот нов шеф на стручниот штаб. Срѓан Захариевски денес потпиша договор со ФК Пелистер и официјално беше претставен пред јавноста. Ова е своевидно враќање на Захариевски во Битола, каде работеше во 2017 година.

– 51-годишниот стручњак има забележителни резултати во своите проекти во мак-фудбалот. Со успех ги водеше Металург, Струга и Воска Спорт. Се работи за поранешен репрезентативец на Македонија (22 настапи и три гола), а во играчките денови ги носеше дресовите на Вардар, Силекс, Тетекс, Металург, како и на клубови во Германија, Португалија, Грција. Захариевски ќе прозива на осми јануари, кога започнуваат подготовките за вториот дел на шампионатот на Македонија, – гласи објавата на „зелено-белите“.