Захариевски: Можам да ветам борба за победа на секој натпревар

Вардар има лош старт на сезоната во Првата македонска лига каде по 4 одиграни кола се наоѓа во долниот дел на табелата или поточно го дели последното место заедно со АП Брера Струмица.

„Црвено-црните“ сменија двајца тренери, прво Горазд Михаилов си замина и тоа по победата над Пелистер за да потоа неговиот наследник Горан Петрески издржи само два натпревари и си поднесе оставка по поразите од Шкупи и Воска Спорт.

Сега на жешкото столче застанува Срѓан Захариевски кој ветува борба, мотив, желба за освојување на бодови на секој натпревар.

-Голема благодарност до раководството, структурите што ми дадоа можност да го водам Вардар и што бев нивниот избор. Не сакам да трошам зборови што значи Вардар. Доаѓам во незгоден момент каде што не можам да корегирам нешто во физичката спремност на играчите, не можам многу да корегирам да доведам нови фудбалери. Ќе се обидеме да се засилиме со некој играч бидејќи има уште неколку денови од преодниот рок. Ова е преодна фаза, добар почеток, за среќа доаѓаат подобри денови во Вардар, од тоа што беше презентирано.

-Сега амбициите се да го стабилизираме клубот, да играме подобро, пред се да се бориме, а тоа да го забележат навивачите и јавноста. Нашите амбиции секогаш се да одиме на победа. До каде ќе стигнеме не можам да кажам, но мора да се бориме на секој натпревар. Можеме да ветам доста работа, борба.

-Мораме бидеме реални, не беа добри првите четири кола. За две седмици се сменија двајца тренери. Сакале да го извадат најдоброто, но прикажаното не беше добро и ќе мора многу да работиме за да се кренеме. Ќе го подобриме тоа што можеме.

-Вардар ќе се бори на секој натпревар, ќе има желба, ќе има мотив кај играчите. Играчите да бидат свесни дека имаат одлични услови за работа. Ова го немаат многу европски клубови. И на крај да кажам дека со нашиот 12-ти играч (фанови) ќе успееме да ги оствариме целите за оваа сезона, -порача Захариевски.

Популарниот Срле ќе дебитира на кормилото на Вардар на мечот против Гостивар.