Захариевски ги доби првите две засилувања како тренер на Вардар (Фото)

Вардар видно го измени првиот тим во споредба со минатата сезона и направи низа промени на речиси сите позиции, но засега тоа не вроди со плод и „црвено-црните“ заминаа како последни на табелата на репрезентативна пауза.

Турбулентниот период во клубот донесе и две тренерски смени во краток временски интервал, па така по заминувањата на Михаилов и Петрески, Срѓан Захариевски е тој што ќе го „гасне пожарот“ во најтрофејниот македонски колектив.

Вардар мора да излезе на прав пат за да избегне нова борба за опстанок оваа сезона, а Захариевски уште на првиот тренинг вети максимално залагање, со напомена дека истото ќе го бара и од новите фудбалери.

Срѓан не селектираше ниту еден играч од актуелниот тим и допрва ќе види со што располага, но денеска ги доби и првите летни засилувања откако е тој шеф на стручниот штаб.

Вардар се пофали со ангажманите на Немања Босанчиќ и Рушту Јонус, двајца фудбалери кои играат на централната позиција во средниот ред.