Вујовиќ во свој стил: Хрватска играше против обложувaлници, новинари, експерти…

Хрватска направи изненадувања и ја совлада Франција во полуфиналето на Светското првенство или поточно си обезбеди најмалку сребро од 29. собир на најквалитетните репрезентации на планетава.

Хрватите одиграа пеколно прво полувреме во кое го разбија противникот на двете страни на теренот, отидоа со 18:11 на пауза за да по одморот се справат со притисокот на Французите, соодветно одговорат кога беше најпотребно и обезбедат пласман во големото финале.

Многумина не веруваа во ваков резултат, а меѓу нив беше и легендарниот Веселин Вујовиќ.

-Секоја чест за Хрватска. Таа играше против обложувалници, експерти, новинари, прогнозери, против сите и ја доби Франција,која сите ја видоа во финалето. Важно е да се нагласи дека Хрватска уште еднаш втор натпревар по ред направи чудо, бидејќи чудо е и да избрише минус 4 во последните 5 минути против Унгарија и да се претвори таква негатива во победа.

-Одбраната потсетуваше на онаа што Хрватска ја играше под водство на Червар, со Вори високо како еден. Мамиќ и останатите крилни играчи се спуштаа. Мамиќ направи огромна работа во одбраната затоа што беше поставен толку високо, пресретнувајќи и попречувајќи ги француските напади, -истакна Вујо за „Индекс“.