Вујовиќ призна дека не го очекувал Вори на клупата на ППД Загреб

Веселин Вујовиќ изненадувачки ја напушти клупата на ППД Загреб, објаснувајќи го потегот со приватни причини, а деновиве хрватскиот првак го промовираше неговиот наследник.

Се работи за поранешниот хрватски репрезентативец Игор Вори, кој првпат презема тренерска функција, а тоа го изненадило и Вујовиќ.

– Малку сум изненаден што Вори го презема Загреб, не знаев дека е заинтересиран за тренерската работа. Но, делува мирно, зад себе има голема кариера и искуство, ова му е голема шанса и се зависи од него, – изјавил Вујовиќ за хрватските медиуми.

Доскорешниот предводник на ППД Загреб вели дека не е лесно да се води овој клуб, но ова е и голема шанса за Вори во насока на националниот тим.

– Во Загреб е и не е лесно да се работи, тоа е лизгав терен за секој тренер. Но, ако Вори се докаже во оваа ситуација, сигурно ќе биде кандидат да го наследи Лино Червар кога овој ќе се пензионира, – рекол Вујовиќ.