Вујовиќ: Некои играчи треба да се замислат, ако сакаат да останат во Вардар…

Тимот на Вардар не се избори за позитивен резултат на пресметката со Кил во Скопје, дуел кој бундеслигашот успеа да го добие откако одигра одлично второ полувреме во кое направи пресврт за конечно славје во СЦ „Јане Сандански“ од 29-26.

Ова за „црвено-црните“ е трет пораз во низа што секако е лоша вест, меѓутоа не е трагично да се загуби од Кил иако тренерот Веселин Вујовиќ има замерки за играта на екипата, па дури им упати и јасна, директна порака на играчите дека едноставно мораат да бидат на повисоко ниво затоа што целта на клубот е висока.

-Честитки до Кил за заслужената победа. Ние пред натпреварот се надевавме дека можеме да победиме затоа што им фалеа неколку играчи иако се работи за ривал кој е искусен и кој игра вакви мечеви секој викенд. Во првото полувреме делуваше дека сме многу блиску, но и во тие моменти многу се мачевме во нападот. Резултатот што го имавме беше поради нашата одбраната и Томовски, но нападот се мачеше, бековите беа надвор од ритам и шутерски не можевме да одговориме на предизвикот со „шест на шест“. Моравме да се обидеме со „седум на шест“ што е огромен ризик, тактика која носи нервоза кај нас на клупата и навивачите.

-Направивме премногу грешки и примивме 19 гола за едно полувреме, преголема бројка за тим како Вардар и начинот на кој јас сакам да играме. Не успеавме да се адаптираме. Сакам да кажам дека има играчи кои треба добро да размислат дали од половина на сезоната ќе останат во Вардар бидејќи од нив очекуваме многу повеќе од нив. Ако Вардар сака да направи нешто повеќе тие ракометари мора да дадат повеќе, да го оправдаат доаѓањето во Скопје, -порача популарниот Вујо.