Вујовиќ ја откри причината зошто заминал од Загреб и најави: Не ја исклучувам можноста за враќање во Вардар

Вчера беше објавено дека Веселин Вујовиќ го раскинал договорот со ППД Загреб и предвреме ќе си замине од редовите на хрватскиот гигант.

Вујовиќ потпиша тригодишен договор со ППД Загреб и веќе го составуваше тимот за следната сезона, па токму затоа изненадувачки дојде ваквата одлука.

Како причина за оставката беа најавени приватни проблеми, а сега Вујовиќ во интервју за црногорскиот портал „Вјести“ откри дека семејниот бизнис барал негово лично присуство  во Шабац.

– Не можев да бидам на две места во исто време. Им реков на луѓето од управата дека имам проблеми во Шабац и истите не можат да се решат ако не сум таму. Имам приватен бизнис, кој се руши ако не сум тука, -изјави легендарниот Вујо.

Во Загреб им кажал дека би можел да се врати во клубот за неколку месеци, кога ќе ги реши сите проблеми.

– Не можев луѓето да ги држам во неизвесност затоа што не знам дали проблемите ќе ги решам за четири, пет или шест месеци. Мислам дека вака е најкоректно. Луѓето од управата знаат дека на мене може да сметаат кога ќе завршам. Тука сум ако им сум потребен, -изјави Вујовиќ, а потоа ги искоментира шпекулациите кои го поврзуваат со брзо враќање на тренерската работа, во се уште актуелниот европски шампион, Вардар.

– Тие шпекулации почнаа уште кога беше објавено дека Михајловски се враќа. Верувајте ми, заминувањето од Загреб не е трик за да го преземам Вардар. Сепак, не исклучувам можност тоа да се случи кога ќе ги решам приватните проблеми, -заклучи Вујовиќ.