Вујовиќ без двајца важни играчи на гостувањето кај Пик Сегед

По одличниот старт на сезоната, Вардар нареди три порази во Лигата на шампионите и влезе во навистина непријатна серија, која Веселин Вујовиќ се надева дека ќе биде прекината вечерва во Унгарија.

Сепак, популарниот Вујо е свесен дека нема да има воопшто лесна задача во Сегедин, уште повеќе откако неговата ротација се скратена за двајца многу важни играчи.

ЕХФ попладнево ги објави официјалните тимови и играчите кои се пријавени за натпреварот од 18:45 часот, на кој нема да настапат Жереми Тото и Жоел Куни Моралес.

Во официјалниот список го нема и Марко Мишевски, што работите ги прави уште покомплицирани за Вујовиќ кој најави дека гостувањето кај силен тим како Пик Сегед е одлична можност за излегување од резултатската криза.

Пред натпреварот во Сегедин, Вардар со пет освоени бода е на шестото место на табелата, додека Пик Сегед е две места погоре со три бода повеќе.