Втора тренерска смена во еден ден: Шкупи му се заблагодари на Ѓока

Новата работна недела стартуваше бурно во македонскиот фудбал, бидејќи по неочекуваната тренерска смена во Вардар, голема промена прави и Шкупи.

Клубот од Чаир освои само еден бод во првите две кола и остави навистина бледа слика на теренот, а вчерашниот пораз од Гостивар резултираше со промена во стручниот штаб.

Шкупи вечерва информираше дека дошло до разделба со Ернест Ѓока, па сега клубот ќе мора да бара адекватна замена на стартот на новата натпреварувачка сезона.

– Управата на Шкупи денеска ја објави одлуката за разделба со тренерот Ернест Ѓока. По важен период на соработка, двете страни спогодбено решија да го затворат ова поглавје со целосно разбирање. Клубот изразува благодарност за придонесот на Ѓока и му посакува успех во кариерата, – гласи соопштението.

Шкупи вчера загуби од Гостивар со резултат 2:0, а во првото коло освои само бод во дуелот со Воска Спорт (3:3).