Втора голема победа во кариерата: Колумбиецот Бернал триумфираше на Џиро Д’Италија

Еган Бернал успеа да одолее на нападите и ја одбрани розевата маичка во Милано, па така стигна до својата прва титула на Џиро Д’Италија која сепак не е негова најголема во неговата кариера.

Младиот колумбиски возач пред две години славеше на Тур Де Франс и со златни букви го запиша своето име во историјата на најлегендарната велосипедска трка, а оваа година покажа дека поседува страшен потенцијал и на најпрестижната трка во Италија.

По 20 извозени етапи, Еган пристигна на завршниот индивидуален хронометар во Милано со предност од две минути во генералниот пласман, па иако загуби 30 секунди на денешната етапа, сепак неговата победа на Џиро во ниту еден момент не беше доведена во прашање.

Бернал мина низ целта со подигнати раце и ја одбрани розевата маичка која традиционално ја носи лидерот на најважната трка на Апенините, а тоа значеше почетокот на големото славје за Колумбиецот.

Домашниот возач Дамијано Карузо заврши втор во генералниот поредок со заостанува од 1 минута и 29 секунди, додека место на пиедесталот имаше уште за Симон Јејтс од Британија.