Втор непријатен удар за Италијанецот: Клоп ја „краде“ трансфер метата на Конте

Антонио Конте остана со празни раце кога е во прашање ангажманот на Адама Траоре, но како што стојат работите во овој момент, италијанскиот стручњак ќе добие нов сериозен удар на трансфер пазарот.

Иако Тотенхем важеше за голем фаворит за потписот на Луис Диаз од редовите на Порто, одбиената почетна понуда од португалскиот клуб направила сериозен пресврт, бидејќи на сцена сега стапил Ливерпул со далеку посериозна и попримамлива понуда.

Угледните британски медиуми сега известуваа дека Ливерпул е во пол позиција за ангажман на брзоногиот колумбиски фудбалер кој блеска во дресот на Порто, бидејќи испратената понуда е подобра од онаа на клубот од Северен Лондон.

Ливерпул гарантира трансфер вреден 45 милиони евра, но уште 20-тина милиони кои дополнително можат да бидат исплатени во бонуси во наредните неколку сезони.

Интересно, Ливерпул се поврзуваше со Диаз и изминатово лето, но изгледа дека „црвените“ сега сериозно се активираа кога сфатија дека Конте може да добие играч кој всушност беше голема желба и на Јирген Клоп.