„Волците“ добија „џокер“: Сарабија со волеј ремек-дело го најави потопот за Тотенхем (Видео)

Пабло Сарабија ретко добива шанса од стартот на сезоната во Премиер лигата, но поранешниот шпански репрезентативец сега доби минутажа во самата завршница и се покажа како неверојатен „џокер“ за Вулверхемптон.

„Волците“ на неверојатен начин стигнаа до пресврт и трумф над Тотенхем, кој по дерби поразот од Челси, сега претрпе нов неуспех и фрли во вода три бода кои ги имаше во ракав до 91-та минута.

Тимот на Постекоглу водеше од раната фаза со голот на Џонсон кој погоди уште во третата минута по фантастичен потег на Кулушевски, па иако со овој резултат се влезе во судиското продолжение, на крајот следеше шок за гостите и екстаза за домаќините.

Сарабија влезе во игра во 87-та минута и четири минути подоцна режираше волеј ремек-дело за паметење, а во 97-та минута испорача и клучна асистенција по која Лемина мирно го совлада Викарио за 2:1.

Навивачите на „Молину“ предизвикаа е рупција на трибините и се израдуваа на големите три бода, додека Сарабија со оваа херојска партија сигурно ќе си избори повеќе шанси од менаџерот О’Нил во иднина.