Вокер откако не е повикан во националниот тим: Мое е да докажам дека се работи за грешка

Англиската фудбалска репрезентација ќе го отвори новото издание на Лигата на нации под водство на новиот селектор Ли Карсли, а тој на својот прв список не го вметна искусниот Кајл Вокер.

Десниот бек на Манчестер Сити нема настап од почетокот на сезоната и Карсли решил да го прескокне за претстојните два натпревара, а Вокер се обидел дипломатски да одговори на прашањето дали е разочаран од одлуката.

– Секако дека сум разочаран, но ја прифаќам реалноста и мое е да докажам дека тоа било грешка.

– Сепак, немам играно од враќањето од одмор и веројатно одлуката на селекторот е правилна. Тој ми се јави за да ме информира уште пред да го објави составот, а јас му порачав дека планирам да се вратам во националниот тим.

– Формата е важна и затоа ја прифатив одлуката, но разочарувањето секогаш се појавува бидејќи нема поголема чест од тоа да ја претставуваш својата земја, – рекол Вокер.