Вокер: Лошото искуство ќе биде предност за Сити во финалето

Играчите на Интер со голема верба влегуваат во големото финале и веруваат во своите шанси за славје над големиот фаворит Манчестер Сити, екипа која пак од друга страна цврсто стои зад ставот треба да го одигра својот фудбал за да испише историја.

„Граѓаните“ ја бркаат својата прва титула во Лигата на шампионите и ќе го играат второто финале во последните три сезони, а токму непријатните епизоди од последните две сезони, според Кајл Вокер ќе бидат голема предност за Сити на завршницата во Истанбул.

– Мислам дека ниту еден голем тим не отишол директно до финалето и победил во Лигата на шампионите. Во фудбалот, секогаш прво треба да ги искусите лошите работи и поразите. Тоа ви дава поголема желба да направите пресврт и да се вратите посилни.

– Наша предност е што веќе сме биле тука како тим, ќе знаеме што следи кога ќе ја слушнеме химната и ќе го видиме трофејот. Првиот пат секогаш е многу потензично.

– Сега, кога ќе влеземе на теренот, ќе знаеме дека претходно сме биле тука и ќе преостане само да го играме својот фудбал и да веруваме во своите соиграчи. Ќе веруваме во Ерлинг Халанд кој дава голови, ќе веруваме во Де Брујне и неговите асистенции, мислам дека ќе поминеме добро, – вели Вокер.