ВМФЛ: Втор пораз во низа за „лавовите“, Башкими се искачи на второто место

Македонија Ѓорче Петров останува лидер на табелата во Втората македонска фудбалска лига, но вториот пораз во низа дефинитивно треба да ги освести „лавовите“ кои одработија речиси перфектен прв дел од сезоната.

По поразот од Башкими на домашен терен, тимот од Ѓорче Петров ова попладне беше непријатно изненаден и од Победа, гостување на кое лидерот загуби со 2:1.

Фаворитот прв поведе со голот на Ѓорѓи Дошев, но прилепачани успеаја да израмнат преку Кофиловски, а потоа да освојат и големи три бода со вториот гол на Димоски.

Добра вест за Македонија е тоа што пораз денеска претрпе и Брегалница на гостувањето во Каменица кај Саса со уверливи 4:0, а од овие резултати, најмногу профитираше екипата на Башкими.

Тимот од Куманово го победи Арсими со 2:1 и се искачи на второто место на табелата, па сега има само два бода помалку од Македонија Ѓорче Петров.