Влаховиќ утре пристигнува на медицински прегледи во Торино

Веќе нема никакви дилеми, српскиот напаѓач Душан Влаховиќ утре ќе пристигне во Торино каде треба да ги мине неопходните медицински прегледи пред официјално да стави потпис на договор со тимот на Јувентус.

Оваа вест ја пренесе познатиот новинар специјализиран за трансфер случувањата во светот, Фабрицио Романо кој ја откри и платата на Влаховиќ.

Одличниот напаѓач во таборот на Јувентус ќе заработува по седум милиони евра годишно, а официјалната објава на трансферот ќе следи наскоро.

Од Јувентус по ангажманот на Влаховиќ ќе се обидат да се ослободат од Дејан Кулушевски кој бил понуден на Милан, а можно е заминување и на Алваро Мората кој притискал за преселба во редовите на Барселона.