Влаховиќ објави дека нема да биде во комбинација за септемвриските натпревари на Србија

Душан Влаховиќ ја започна првата сезона под водство на Тиаго Мота во одлична форма, но српскиот напаѓач денеска објави дека нема да настапи за својата репрезентација на претстојните натпревари од Лигата на нации.

Членот на Јувентус го информирал селекторот Драган Стојковиќ дека нема да биде во комбинација, а одлуката ја донел поради приватни причини.

За да избегне шпекулации, Влаховиќ самиот преку социјалните мрежи ја објави информацијата и потврди дека Србија ќе биде без важен играч на претстојните натпревари.

– Денеска го известив стручниот штаб дека поради семејни причини нема да бидам во можност да го прифатам повикот на селекторот за дуелите со Шпанија и Данска, – напиша Влаховиќ, потврдувајќи дека ќе ги скокне натпреварите на националниот тим.

Пред репрезентативната пауза Јувентус има уште дерби соочување со Рома, а на 5. септември следува натпреварот на кој Србија ќе му биде домаќин на актуелниот европски шампион Шпанија.