Влаховиќ и Консеисао испорачаа мајсторски голови, Јувентус направи голем пресврт во Лајпциг (Видео)

Јувентус во 65. минута од гостувањето кај РБ Лајпциг имаше гол негатива и фудбалер помалку на теренот, но тоа не ги спречи „бјанконерите“ да стигнат до голема победа (2:3) до крајот на средбата во Германија.

Италијанскиот состав доминираше на теренот и се обидуваше да најде празнина во редовите на одлично поставениот бундеслигаш, а по една неискористена шанса, домаќините направија брза контра и Шешко реализираше по одличната асистенција на Опенда.

Тоа беше резултат на полувреме, а Јувентус во вториот дел повторно продолжи со притисокот и од него успеа да израмни преку Влаховиќ, кој го постигна првиот од двата гола во 50. минута.

Девет минути подоцна, Ди Грегорио ја закачи топката со рака при интервенција надвор од шеснаесетникот, судијата доби повик од ВАР собата и му додели црвен картон на голманот на Јувентус.

Неколку минути подоцна, при изведување на слободен удар, тукушто влезениот Даглас Луиз ги искористи рацете за да се заштити од топката, а францускиот судија Летексие сметаше дека тоа е доволно за пенал, па во 65. минута Шешко повторно ги донесе „биковите“ во водство.

Јувентус се најде во незавидна позиција, но не се откажа од позитивен резултат, а тоа донесе сериозен ефект. Најпрвин, во 68. минута Влаховиќ шутираше атрактивно и неодбранливо под гредата на Гулачи, додека резервистот Консеисао направи целосен пресврт со една индивидуална мајсторија во 82. минута од натпреварот.

Домаќините до крајот притискаа, имаа и шанси, судијата им овозможи и девет минути надополнување на времето, но избраниците на Марко Розе не успеаја да израмнат. Победата за гостите е уште позначајна ако се знае дека уште на самиот почеток Бремер и Гонзалес заработија повреди и Тиаго Мота мораше да направи две принудни замени.

Тренерот на РБ Лајпциг и денеска направи пет замени и повторно не му даде шанса на македонскиот репрезентативец Елиф Елмас.

🚨🚨| GOAL: FRANCISCO CONCEICAO GIVES JUVENTUS THE LEAD!!!

Leipzig 2-3 Juventus

pic.twitter.com/BWwNB3f9GD

— CentreGoals. (@centregoals) October 2, 2024