Винисиус кон капитенот на Атлетико: Јас имам две титули во ЛШ, ти немаш ништо (Видео)

Мадридското дерби кое вчера се одигра на „Метрополитано“ најмногу ќе се памети по прекинот кој го предизвикаа домашните навивачи, но како и обично, имаше уште неколку тензични моменти во кои главни актери беа играчите на двата тима.

Тензијата е составен дел од мадрилењо дербито кое значително се заостри во последните две децении, а покрај стадардните груби стартови и жестоки дуели, се почеста слика се и провокациите.

Играчите на двата тима вчера си разменуваа многу зајадливи зборови во текот на сите 90 минути, но специјализираните емисии во Шпанија го издвоија дуелот меѓу Винисиус и Коке.

Капитенот на Атлетико по еден дуел бара од Вини да стане од земја и да не глуми непотребно, по што Бразилецот возвраќа доста бурно и со доза на големо потценување.

– Јас имам две титули во Лига на шампиони, ти немаш ништо. Да да, јас имам две, а ти немаш ништо, – му порачал Винисиус на Коке, кој во чудење му аплаудирал и на глас извикал „после јас ќе бидам тој кој ќе добие црвен картон“.

Во продолжение, Винисиус се „закачил“ и со Маркос Љоренте, на кого му порачува дека направил трансфер од Реал во Атлетико само за да добие простор за игра.

– Дојде тука само за да добиеш шанса да играш……, – му порачал Вини на Љоренте.