Винисиус ја одложил одлуката за трансфер во Саудиска Арабија само поради една причина

Шпанските медиуми неодамна објавија дека Винисиус добил преатрактивна понуда од Саудиска Арабија и размислувал за разделба од Реал Мадрид, но на крајот Бразилецот ја отфрлил таа опција и дефинитивно и сезонава ќе настапува за актуелниот шпански и европски шампион.

Но, „ЕСПН“ тврди дека Винисиус не ја затворил вратата за богатата понуда од Азија, туку само ја одложил одлуката до следното лето, кога повторно ќе размислува дали да стане најплатен играч во светот.

Извори на американскиот медиум тврдат дека Винисиус не сакал да ја напушти Европа поради тоа што смета дека има шанси да ја освои „Златната топка“ и тоа било главната причина што барем уште една сезона сигурно ќе биде дел од составот на Реал Мадрид.

Реал никогаш не добил конкретна понуда за фудбалерот кој има откупна клаузула од 1 милијарда евра, но затоа Винисиус добил ветување за плата од неверојатни 350 милиони долари по сезона.

Одговорните на Јавниот инвестициски фонд на Саудиска Арабија се оптимисти дека и Реал ќе ја омекне својата позиција следното лето и ќе биде заинтересиран за преговори со трансфер сума под наведената клаузула, пред се поради фактот што на Винисиус ќе му останат уште две години од актуелниот догоовор.