Вилјаш-Боаш останува на клупата на Олимпик Марсеј

Раководството на Олимпик Марсеј ја информираше јавноста дека досегашниот тренер Андре Вилјаш-Боаш одлучил да остане на истата функција и наредната сезона.

По заминувањето на неговиот близок соработник Андони Зубизарета, се шпекулираше дека и Португалецот ќе го напушти „Велодром“, но разговорите меѓу двете страни донеле позитивен исход.

Марсеј претходно соопшти дека ќе му понуди нов двегодишен договор на Вилјаш-Боаш, а сега во изјавата до медиумите потврди дека нема да бара нов тренер за наредната сезона.

Вилјаш-Боаш му го обезбеди второто место на Олимпик во сезоната која беше порано завршена, што значи дека ќе го предводи тимот и во Лигата на шампионите, натпреварување во кое оваа екипа нема учествувано од сезоната 2013/14.

Претходно, тренерот на Марсеј изјави дека пред да ја донесе одлуката, ќе разговара со челниците за да дознае какви планови имаат за претстојниот преоден рок.