Виеира ќе преземе италијански прволигаш

Патрик Виеира првпат ќе работи како тренер во Серија А и ќе се обиде да обезбеди опстанок за тим кој е во резултатска криза од почетокот на сезоната.

Италијанските медиуми тврдат дека Џенова сепак решила да му даде отказ на Алберто Џилардино и да го назначи Французинот, кој веќе има солидно искуство како тренер изминативе години.

Засега се чека на официјална потврда од страна на клубот, но очигледно е дека Џилардино ја загубил довербата и раководството сака брза промена, со цел да се подобрат резултатите уште во првиот дел од сезоната.

Виеира како самостоен тренер работеше во Њујорк, Ница, Кристал Палас и Стразбур, а со последниот француски клуб се раздели по крајот на претходната сезона.

За Французинот ова би било враќање во Италија, каде со успех го носеше дресот на Јувентус и Интер, а првично и во Милан каде доби минимална минутажа и остана само една сезона.