Ветеранот Цуцули повторно ќе го носи дресот на Шкендија

Поранешниот македонски шампион Шкендија има амбиции сезонава повторно да се врати на врвот во домашниот фудбал и да биде број еден, па гради квалитетен тим во кого место ќе има и за искусниот Ардијан Цуцули.

Ветеранот се враќа во „црвено-црното“ семејство по пауза од четири години, период во кој играше во Кукеши и Дрита од Гњилане.

-Кога станува збор за Шкендија, нормално секој камбек е емотивен. Духовно сум поврзан со Шкендија бидејќи најславните години во кариерата ги поминав како фудбалер носејќи го дресот на Шкендија. Еве се враќам во мојот дом, тука имам и соиграчи со кои во минатото игравме заедно во Шкендија.

-Со Шкендија првпат бевме шампиони во 2011 година и верувам дека оваа година заедно ќе ги оствариме нашите цели и ќе ја вратиме шампионската титула, -порача Цуцули кој со клубот од Тетово има освоено пет трофеи (2 домашни титули, 2 купа и 1 Супер куп).