Вертонген им одговори на Де Брујне и Азар: Толку можеме со стари офанзивни играчи

Белгија ќе одлучува за пласман во осмифиналето на Светското првенство во директен дуел со Хрватска во последното коло, а тоа е јасна најава дека „црвените ѓаволи“ можат и да извисат и да доживеат неочекувано рана елиминација.

Селекторот Мартинез не може да го пронајде вистинскиот состав и формација, а очигледно има недоразбирања и меѓу репрезентативците.

Во првото коло на теренот се расправаа Де Брујне и Алдервајрелд, а првата ѕвезда предизвика дебата и со изјавата дека Белгија не може да стане светски првак затоа што има превозрасни фудбалери. Изјава во сличен стил имаше и Еден Азар, кој директно ги споменал стоперите.

По поразот од Мароко, отровна стрела на сметка на Де Брујне и Азар стигна од поискусниот Јан Вертонген, кој очигледно алудирал на неговата изјава.

– Не направивме доволно шанси, а примивме два исти гола на прва статива (едниот беше поништен).

– Мислам дека имаме квалитет да се надеваме на подобар резултат во третото коло, но очигледно напаѓаме лошо затоа што офанзивните играчи се престари, – рекол Вертонген.