Велосипедска драма во Милано: Британецот Гејган Харт е сензационален победник на Џиро Д’Италија

После извозени 20 етапи и многу возбуда на планинските етапи и оние со спринт завршници, крајот на годинешното издание на Џиро Д’Италија едноставно не можеше да биде подраматичен и посензационален, бидејќи на крајот победник е човекот кој ниту еднаш во претходните 20-тина дена не ја облече розевата маичка.

Тао Гејган Харт е сензационален победник на најпрестижната велосипедска трка во Италија, откако излезе подобар во директниот дуел кој го имаше со Џај Хиндли.

За првпат во историјата, двајца велосипедисти имаа идентично време во генералниот пласман пред стартот на последната етапа, а денеска во Милано не можеше да биде повозбудливо, бидејќи се возеше индивидуалниот хронометар.

Победник на завршната етапа беше домашниот велосипедист Филипо Гана, но апсолутен победник на Џиро Д’Италија беше 25-годишниот Британец.

Возачот кој го претставува Инеос ниту еднаш не ја облече розевата маичка во претходните 20 етапи, но затоа ја облече кога беше најпотребно, на целната линија во Милано. Гејган Харт оствари 39 секунди подобро време од она на Хиндли на хронометарот, па стигна до својата прва титула на една од трите највлијателни трки во светот на велосипедизмот.

Австралиецот Хиндли кој беше лидер до денеска на крајот мораше да се задоволи само со второто место, додека третото место во генералниот пласман му припадна на Вилко Келдерман.