„Вечно дерби“ и во финалето на Купот: Еурофарм Пелистер закажа нов ракометен спектакл во Кавадарци

Според сите очекувања и прогнози, во недела во Кавадарци ќе бидеме сведоци на нов ракометен спектакл во Македонија, бидејќи Вардар и Еурофарм Пелистер без проблеми се изборија за нова пресметка во битката за трофеј.

Откако првично Вардар победи во првото полуфинале против вториот тим на Еурофарм Пелистер, првиот тим на битолчани вечерва ја оправда фаворитската улога против Бутел и со сигурна победа закажа финална пресметка против вечниот ривал.

Еурофарм Пелистер брзо го наметна својот посакуван ритам и во првиот дел од првото полувреме одржаваше предност од четири разлика, а до заминување на паузата направи огромна предност од плус седум гола (16:9).

Ова беше добра најава дека Бутел нема што да бара против далеку подобриот и поквалитетен противник, па иако се обиде да се врати, тоа беше безуспешно и само успеа да го ублажи поразот.

На крајот, Пелистер победи со 25:21 и се чекираше како втор патник во финалето во Купот, во кое за противник ќе го има Вардар во битката за титулата.

Павлетиќ со шест гола беше најефикасен во победничкиот тим, еден помалку постигна Мандалиниќ, а по пет реализации имаа и Митев и Мајиќ во противничкиот табор.