Вашингтон од минус 17 до славје против шампионот, Јута со нов тројкашки рекорд го потопи Шарлот (ВИДЕО)

Екипата на Вашингтон Визардс го направи најпријатното изненадување во НБА лигата и по голема борба славеше на гостувањето во Лос Анџелес кај Лејкерс со 127-124.

Домашниот состав водеше со 17 разлика во третиот период, меѓутоа гостите од американската престолнина не се предадоа, покажаа карактер, знаење и веќе до крајот на овој период дојдоа само на минус шест за да во завршните 12 минути видиме повторно квалитетна игра, бришење на „негативата“ за конечни 115-115 што значеше продолженија во „Стејплс Центарот“.

Во дополнителните минути Вашингтон беше подобар со 12-9 и со тоа дојде до петтиот триумф во низа во најсилната лига на светот. Бил даде 33 поени со 7 скокови и 6 асистенции, Вестбрук пак имаше 32 кошеви со 14 скокови и 9 асистенции.

На спротивната страна Леброн беше број еден со 31 поен, 9 скокови и 13 асистенции.

Најдобрата екипа во лигата, Јута Џез дојде до 25 славје во сезоната и тоа против Шарлот Хорнетс со 132-110. „Џезерите“ беа брилијантни, поставија нов клупски рекорд со 28 погодени тројки, Мичел беше прв стрелец со 23 поени.

Бол и Хејворд на спротивната страна беа автори на 21 кош.