Вардар порано од предвиденото доби две засилувања за преостанатиот дел од сезоната

Екипата на Вардар, порано од предвиденото ги засили своите редови со двете репрезентативни засилувања кои доаѓаат од редовите на Пролет.

Станува збор за Томислав Јагуриновски и Михаил Аларов кои во вториот дел од сезоната ќа му помогнат на актуелниот шампион во битката да ја одбрани титулата во домашниот шампионат.

Двајцата ракометари беа договорени да пристигнат во „Јане Сандански“ по крајот на оваа сезона, но по разговорите меѓу Вардар и Пролет беше одлучено тие да го облечат „црвено црниот“ дрес уште оваа зима.

Томислав Јагуриновски по трет пат ќе се врати во Вардар, клуб од кој потекнува и клуб за кој играше пред две години.

Михаил Аларов пак важи за еден од најперспективните македонски кружни напаѓачи и сигурно ќе има што да научи во Вардар од Столе Стоилов, а минутажа ќе дели уште и со Милан Лазаревски и Стефан Атанасовски.

Пикерот веќе ги започна тренинзите со тимот на Вардар, додека Јагуриновски ќе му се приклучи на „старо- новиот“ тим по завршувањето на Светското првенство од кое е дел со репрезентацијата на Македонија.