Вардар останува во Втора лига, Воска ќе игра историски бараж за влез во Првата лига

Воска Спорт како сензација на годината во Втората македонска фудбалска лига се избори за историја ова попладне, бидејќи ремизираше на гостувањето во Кратово и со тоа си обезбеди бараж дуел за пласман во Првата лига.

Со освоен бод против шампионот, тимот од Охрид немаше потреба да гледа што се случува на натпреварот на Вардар, кој иако победи на крајот, не успеа да дојде до второто место.

Ваквиот епилог прави Воска Спорт да ја заврши сезоната со само еден бод повеќе до Вардар, кој и наредната сезона ќе игра во понизок ранг на натпреварување.

Воска денеска поведе на гостувањето кај Силекс откако претходно приреди „шпалир“ за шампионите, но голот на Илијоски беше активен до 78-та минута, кога домаќините израмнија на 1:1 преку Танушев. Ова се покажа како конечен резултат и Воска почна да слави во Кратово, бидејќи сега ќе игра бараж за влез во Првата лига.

Од друга страна, Вардар успеа да слави против Кораб и победи 2:1, но мора да се помири со уште една сезона во Втора лига.