Вардар оди во Анталија, закажани се пет контролни натпревари

Екипата на Вардар главниот дел од подготовките за вториот дел од шампионатот ќе ги одработи во Анталија објави македонскиот прволигаш.

Тимот кој е најактивен во досегашниот тек на пазарот ќе замине во Турција на 18 јануари и ќе се задржи до 8 февруари, период во кој ќе одигра пет контролни натпревари и кои ќе треба да му помогнат на тренерот Гоце Седлоски на најдобар можен начин да ја подготви екипата која ја очекува жестока битка за опстанок во ПМФЛ, плус тука е и настапот во Купот на Македонија.

„Црвено-црните“ ќе излезат на мегдан со клубови од Казахстан, Грузија, Украина, Унгарија и Австрија, поточно ќе играат против Актобе, Сабуртало Ибериа 1989, Верес, Чаквар и Рапид Виена.