Вардар го „скрши“ Бутел во вториот дел, Еурофарм Пелистер запиша убедлива победа

По стартниот пораз од Алкалоид, Вардар ја врза четвртата победа во ракометната Суперлига, овојпат на гостувањето кај екипата на Бутел.

Големиот фаворит играше доста релаксирано во првиот дел по големата победа над Еурофарм Пелистер во дербито, но тесниот резултат во првиот дел се должеше и на добрата поставеност на домаќините.

Бутел парираше во првите 30 минути кои завршија со резултат 15:16, но Вардар успеа да го скрши отпорот во вториот дел и да дојде до мирна завршница во која славеше со три гола разлика (27:30).

Покрај Вардар, победа во вонредното коло во ракометната Лига оствари и Еурофарм Пелистер, тим кој успеа да се опорави по болниот пораз од Вардар.

„Зелено-белите“ немаа проблеми против Тинекс Пролет и убедливо славеа на домашен терен со 30:21.