Вардар го договори наследникот на Вујовиќ

Веселин Вујовиќ неславно ја заврши последната трета етапа како тренер на РК Вардар, иако ја имаше поддршката и на менаџментот и на навивачите.

Легендарниот „Вујо“ не успеа да го извлече најдоброто од ракометарите во црвено-црниот дрес и јавноста веќе подолго време шпекулира со името на наследникот, при што како главни кандидати се спомнуваа Давид Дејвис, Славко Голужа и Урош Зорман.

Медиумските шпекулации одеа во насока дека новиот тренер ќе се знае пред Божик, па „Дерби“ дознава дека одлуката паднала и конечно е договорено клубот да го преземе Урош Зорман, доскорешен играч на словенечката репрезентација и РК Целје, кој во 2017 година објави крај на кариерата. Тој мина една сезона како помошник на Талант Душебаев во Кјелце, а потоа го презема словенечкиот клуб Тимо Требње. Зорман си подал рака со раководството на Вардар и ги договорил своите услови за ангажманот.

Ваквиот расплет ќе уследи на крајот од сезоната, а дотогаш се очекува Владо Недановски да продолжи да ја води клупата на Вардар. Зорман ќе го преземе кормилото потоа, со цел да направи селекција на играчи за следната сезона во која тој ќе биде на чело.