Вардар го доби Охрид и го задржа перфектниот учинок во плејофот

Екипата на Вардар 1961 се избори за победа над ГРК Охрид од 28:24 во премиерниот натпревар од третото коло од плејофот во Суперлигата.

„Црвено-црните“ не блескаа на овој меч, играа променливо, меѓутоа целта беше остварена, победа со која е задржан перфектниот учинок во трката за титулата.

Вардар беше одличен во првиот дел на првото полувреме каде водеше со 5:1, 10:4, но како што одминуваше времето гостите се враќаа во игра и на пауза домаќиниот замина само со гол предност 13:12.

И во вториот дел се играше борбено, фаворитот диктираше темпо, водеше, меѓутоа Охрид постојано беше присутен, се закануваше, меѓутоа немаше и доволно сили за да го сврти натпреварот во своја полза.

На крајот плус четири за поранешниот македонски шампион каде се издвои Горига со 7 гола, на другата страна Винициус даде 5 гола.