Вардар бара одложување на дербито против Пелистер поради лоша здравствена ситуација во тимот

Вардар во понеделникот можеше да одмора играчи против Голден Арт и им даде шанса на оние кои имаат помала минутажа, но сега испадна дека тренерот Недановски бил и принуден да прави такво нешто.

Лидерот во Суперлигата се соочува со неочекуван здравствен проблем кој зафатил најголем дел од тимот, па поради истиот, Вардар сега со официјален допис побара одложување на дербито против Еурофарм Пелистер кое треба да се игра претстојниот викенд.

– Поради новонастанатата здравстевана ситуација во клубот, РК Вардар испрати допис и информација до Натпреварувачката комисија на Ракометната федерација на Македонија и до РК Пелистер.

„Би сакале да Ве известиме дека во моментов, заклучно со денешниот последен тренинг на екипата, имаме 15-тина играчи и членови на Стручен штаб кои се зафатени од тешка вироза и не се во можност ниту да тренираат, ниту да играат натпревар.

Поради ова, би сакале да најдеме заедничко решение за оваа состојба која го зафати клубот, а се во интерес на регуларноста на Првенството, фер-плејот и спортското џентлменство. За поткрепа на се ова што го говориме во текот на утрешниот ден, ќе испратиме и медицински извештаи со кои што се потврдува горенаведеното.

Во овој момент, би сакале да побараме Официјално одложување на натпреварот од 8-коло Супер-лига мажи, помеѓу екипите на Еурофарм Пелистер и Вардар 1961, се до пронаоѓање на следен датум којшто ќе одговара на двете екипи. Спортски поздрав, – гласи објавата на Вардар.