Валенсија размислува за отказ, Бараха сепак може да „преживее“ поради неколку фактори

Шпанска Валенсија се најде во тешка ситуација по вчерашниот пораз од Валјадолид, а медиумите најавуваат дека нашиот Столе Димитриевски наскоро може да добие нов тренер.

Резултатската криза кулминираше со вчерашниот пораз на дербито на дното и фактот што поранешниот шпански шампион ја презема улогата на фенерција во Ла Лига, па експресно се зголеми и притисокот врз Рубен Бараха.

Валенсија врза три порази и има најмалку освоени бодови од 15 натпревари во својата клупска историја, па иако Бараха досега ја имал поддршката на раководството, таквиот статус е променет и нема да биде изненадување ако пристигне информација за негов отказ.

Сопственикот Петер Лим има предвид дека ќе треба да му исплати отштета од 5 милиони евра на Бараха доколку реши да го отпушти, а истовремено е потребна и опција за соодветна замена, па затоа и Валенсија нема да брза во донесувањето одлука и тоа се фактори кои одат во прилог на Бараха.

Во прилог на поранешниот играч на Валенсија оди и фактот што неговиот тим има два натпревара помалку, а наредниот период ќе се соочи со Еспањол и Алавес, што е шанса за подобрување на позицијата на табелата.